لماذا لا يوجد مستقبل لك كا شادى ؟ !!

أسم شادى من الأسامى الرقيقة الحالمة التى تعّبر عن شاب فرفور حّساس مرهف المشاعر .. ينفع يغنى او يعزف مزيكا او يلعب باليه ولا تناسب اى حاجة تانى غير سن المراهقة وبس … وهيااااااااااااااااااا دى المشكلة !!!

من صغرى وانا فرحان ان اسمى مختلف !! شادى بقى وكدة والبنات صحابى تقول شاتى وانا افرفر ف اديهم من محن أمهم وسهوكتهم التى لا تقاوم بس للأسف كبرت واكتشف حقيقة ان مستقبل اسم شادى ملوش ملامح !!!

دخلت الجيش وبقيت “العسكرى شادى” .. ام الضحك الى كان بيتضحك من الشاويش وهوا بينادى اسمى ف الطابور !! .. اسم شادى بيفقدك كل معانى الوقار والهيبة الى بتخلقها لنفسك ، فا بمجرد ماترسم الجدية على وشك وتضرب البدلة وتدخل تعرف نفسك على انك مهندس ف شركة عالمية وتبلغ من العمر 26 عاما والفشخرة الى بتستمر لاكثر من 4 دقائق ينتهى الحال بإسم حضرتك إيه فا تقول .. شادى !! طب دا كلام؟ بعد المقدمة دى وتطلع ف الأخر شادى مش رأفت ولا مدحت ولا محمد ولا ابراهيم ولا اى حاجة .. شادى؟ طب فرقت إيه عن وائل وتامر؟ … ولا حاجة !!

نيجى بقى لمرحلة الزواج !! مراتك هتعانى رغم إنها هتفرح بيك ف الأول بس فى مرحلة ما ان اسمك شادى دا فى حد ذاته هيكون سقطة فى تاريخها الحضارى لانها أول ما هتتم ال 40 هيبتدى يخلق لها مشكلة إن الناس هتفتكرها متجوزة واحد اصغر منها !!

ونصل الى المشكلة التى أرقت كل شادى واطارت النوم من عينية وهى انك هتقعد 15 سنة من أول ماتستوعب فداحة اسمك لحد ماتخلص فترة المراهقة تفكر ف سؤالين بس ” هوا انا لو خّلفت هسمى الواد او البنت ايه” .. ” إيه الاسم الى يتنيل يليق مع اسم شادى دا” ؟؟؟ ولن تجد إجابة أبداً عزيزى الشادى !!

طب بلاش كل الهرى دا، لو بقيت رئيس جمهورية شعبك هيحترمك ازاى؟ لو بقيت ضابط منتظر إيه من مسجل خطر مسكته ف الباطنية لما يسمع العسكرى بيقولك تمام يا شادى باشا القوة مشطت المنطقة؟ دا مش بعيد يضرب نفسه بالمطوة علشان صحابه مايعيرهوش إن الضابط الى قفشه اسمه شادى !! وياسلام بقى لو بقيت قاضى والمتهم بالإعدام عرف إن القاضى الى بيحاكمه شادى؟ دا مش بعيد يجيله هيسترية ضحك وهوا لابس البدلة الحمرا !! … وكل دا كوم و لو روحت الجيم وبقيت منفوخ أكتر من تيران المصارعة ونفشت ريشك على واد بيعاكس البنت الى معاك وقالتلك بس ياشادى سيبه .. احى احى !!

ثم ندخل بقى فى أخطر المراحل وهى مرحلة ربيع العمر .. حضرتك لو حجيت او ربيت دقنك تقدر تقولى هيكون لقبك إيه؟ الشيخ شادى؟ ولا الحاج شادى؟ .. طب ماضحكتش وانت بتقول الشيخ شادى؟ شايف نفسك فيها أصلا؟

وياسلام بقى لما تبقى جد ويجى الطفل يقولك جدو شادى جدو شادى هات اجيب مصاصة .. راحت هيبة جدو شوقى وجدو اسماعيل وجدو فؤاد !!

الخلاصة ياعزيزى نحن نحمل اسم بلا مستقبل وقور

استمتع بطفولتك قدر ماتشاء .. استمتع بصديقات النادى .. غنى .. صور .. انكش شعرك واشتغل رسام .. البس فيزون وأرقص ف الأوبرا .. لانك بعد الثلاثين هتشوف كمية تريقة لم تراها فى حياتك قط

ياشادى !!

Writen By: Shadi Kamal Kandil – Twitter: @shadi_casper

كل كلمة موجودة فى هذة المدونة انا من كتبها دون نقل أو مساعدة لذا فهى حق أصيل لى و تعبر عن رأى شخصى وغير مسموح بالنشر أو الأقتباس دون الرجوع لى لأن معظم المواضيع مسجلة بحقوق ملكية فكرية خاصة بى وموثقة, لذا أى نقل بغير موافقة شخصية منى أو إشارة للكاتب والموضوع الأصلى يعتبر سرقة