لتحيا الشرعية حتى وإن سقط المواطن والوطن !!

أهم حاجة إن الرئيس الشرعى يرجع ونحترم ديموقراطية الصندوق و مانسمحش بالإنقلاب دا وعودة حكم العسكر ..

بس مش مهم إن طالب الثانوية والمستشفيات والأماكن الحيوية كان بيقطع عليها النوركل يوم ساعات !!
بس مش مهم السواق و صاحب العربية يقف فى طابور البنزين و السولار نص يوم !!
بس مش مهم إن كل الأسعار زادت بطريقة رهيبة !!
بس مش مهم إن رئيس بقاله سنة بيتكلم عن المؤامرات ومحلهاش كإننا المفروض نستحمل وخلاص ونرضى بالأمر الواقع إن الدولة العميقة هتفضل تفشخنا كدة على طول !!
بس مش مهم إن سينا بقت وكر للإرهابين والجماعات المسلحة !!
بس مش مهم إن الناس كفرت بالثورة و بقت تقول فين أيامك يا مبارك !!
بس مش مهم إننا إتقسمنا لـ100 طايفة الكره ماليها للأخر كإنه عدو !!
بس مش مهم إتهام كل الى ضد السلطة الحاكمة بإنه خاين أو عميل أو كافر أو ضد تطبيق شرع الله !!
بس مش مهم الخطاب التحريضى وحالة الإحتقان الى وصلنا ليها !!
بس مش مهم إن فى ناس متطرفة خدت عفو رئاسى وتصدرت المشهد السياسى وبتتكلم ف كل مكان ببجاحة !!
بس مش مهم إن الرئاسة والحزب الحاكم عادوا كل مؤسسات الدولة بإسم إنهم فاسدين ومش عاوزيين يتطهروا وخلقوا مليون أزمة فى كل قطاع !!
بس مش مهم إن الرئيس ليه غطاء شعبى من جماعته بيبررله كل حاجة ويسقفله ويهللله ويطبله حتى لو غلط !!
بس مش مهم إن الفقير عمال يزيد فقر كل يوم والإقتصاد بينهار !!
بس مش مهم إن العالم بيضحك علينا من مواقف وخطابات سيادة الإستبن المنتخب وحكومته !!
بس مش مهم إننا بقينا فاشيين بنقتل بعض و بنطبل للحاكم زيى الأول بالضبط !!
بس مش مهم إن فى عهده كل الناس خدت براءة مع إن النائب العام ووزير العدل هوا الى عينهم !!
بس مش مهم إن وقع ضحايا كتير ودم زى الأول برضه فى عهده !!
بس مش مهم إقصاء الأخر والإنفراد بالحكم و العجرفة وعدم الإعتراف بالأخطاء !!
بس مش مهم تعيين أهل الثقة مش أهل الخبرة وإفشال البلد بطريقة غريبة وسريعة !!
بس مش مهم إن المتحدثين بإسم جماعة الرئيس والمواليين ليهم خطابتهم تحريضية متطرفه !!
بس مش مهم التعينات الى بدون أى أساس منطقى إلا إنهم تبع الجماعة !!
بس مش مهم إن الى بدقن والمنقبة والشيوخ بقى فى عهده مضطهدين أكتر من عهد مبارك !!
بس مش مهم إنه رفض إستفتاء على شرعيته هوا بينادى بيه دلوقتى ولو كان هوا الى قال كدة كان هيحل المشهد !!
بس مش مهم إنه رفض يقيل حكومة قنديل الفاشلة بإجماع كل الأراء كإنه جوز أمه !!
بس مش مهم إنه ماخدش أى قرار يهدى الشارع وكإنه كان متعمد إن الدنيا تهيج أكتر !!
بس مش مهم إن مستشارينه لبسونا فى كام حاجة وماتحاسبوش !!
بس مش مهم الخروج بقرارات غير مبررة تزود الإنقسام وتخلق مشاكل من مفيش !!
بس مش مهم المحافظين والوزراء والمسئولين مايكونوش خبرة !!
بس مش مهم إنهم كانوا بيطبلوا للجيش والشرطة ويسحموهم من الحساب طوال سنه وفجأة قالوا عليهم خونة !!
بس مش مهم إنهم كانوا هيصدروا قانون قمع للتظاهر والإعتصام وبيقولوا الى بيقطعوا الطرق بلطجية ودلوقتى بيعملوا بالضبط كل الى كانوا رافضينه !!
بس مش مهم تصنيف مصر كدولة راعية للإرهاب وهروب المستثمرين منها !!
بس مش مهم إن كل البلاوى الى بتحصل فى وزارات وقطاعات هوا نفسه الى عين المسئولين فيها دلوقتى !!
بس مش مهم إننا ماشفناش مشروع نهضة ولا خطة 100 يوم وماشفناش غير كدب ونسب إنجازات ليهم مش هما الى عاملينها أو تبرير وخلاص !!
بس مش مهم إنه ماحققش معظم إن ماكنش أغلب وعوده وخسر كل الناس إلا جماعته !!
بش مش مهم إن البلد إتقسمت بسبب إستفتاء وناس ماتت وإتعذبت على سور لمجرد خروجهم للإعتراض !!
بس مش مهم إنهم بيتحاموا بالغرب للضغط أو حتى التدخل علشان رئيسهم يرجع !!
بس مش مهم إن كل الى بيحصل من ضرب و إرهاب فى سينا بيحصل علشان مشى كإن الناس دى نفسهم يرجع !!
بس مش مهم إننا فى سنة رجعنا لورا 100 سنة !!
مش مهم أى حاجة ياجماااااااااااااااااااااعة

أهم حاجة إن الرئيس الشرعى يرجع ونحترم ديمقراطية الصندوق و مانسمحش بالإنقلاب دا وعودة حكم العسكر ..

أهم حاجة الرئيس يرجع مهما كان فى دم !!
أهم حاجة ديموقراطية الصندوق كإنه جواز كاثوليكى ماينفعش يكون فيه طلاق لو طلع طرف فاشل !!
أهم حاجة مايكونش فى إنقلاب ولا حكم عسكر حتى لو مضطر تحتمى بقوة مسلحة تحميك من تطرف المواليين للحزب الحاكم أو الجهاديين فى سينا !!

مش مهم الفقير ياكل المهم الشرعية ورفض الإنقلاب..
مش مهم الفقير يعيش أهم حاجة الشرعية ورفض الإنقلاب..
مش مهم الفقير يرتاح أهم حاجة الشرعية ورفض الإنقلاب..
مش مهم الفقير يحس فعلا إن كان فى ثورة علشانه المهم الشرعية ورفض الإنقلاب..
مش مهم الفقير يلاقى رئيس يشرفه ويفهمه لإن أهم حاجة الشرعية ورفض الإنقلاب..
مش مهم الفقير يعيش فى أمن ويلاقى شغلانه لإن أهم حاجة الشرعية ورفض الإنقلاب..
مش مهم الفقير ميلاقيش الى بيحرض ضده أو يحرضه أو يغسل دماغه أهم حاجة الشرعية ورفض الإنقلاب..
مش مهم الفقير ولا مهم العيان فى مستشفى قطع فيها النور ولا مهم طالب مش عارف يزاكر ولا مهم ناس كرهت بعض بسبب السياسة ولا مهم الإرهاب الى بقى وباء ولا مهم الإلحاد بيزيد ولا مهم شيوخ الفضائيات بيتاجروا بالدين ولا مهم الأكل سعره بيزيد ولا مهم المسئوليين الفشلة ولا المهم أى حاجة..

المهم الرئيس شرعى وديموقراطية الصندوق ورفض حكم العسكر وإنهم بيضربوا الناس وهيا بتصلى وإنهم متضهدين وإن عودة الإستبن الفاش مطلب ناس كتير فى الميادين دلوقتى
وطظظظظظظظظظظظظظظظظظظظ فى كل حاجة غير كدة وطظ فى ضباط وعساكر الجيش الى بتتقتل فى سينا وطظ فى الى ماتوا قبل كدة وهما نفسهم قالوا إيه وداهم هناك وطظ فى الإقتصاد وفى أكلنا وفى راحتنا
طظظظظظظظظظظ بس المهم الرئيس يرجع والجيش الكخة المنقلب يمشى

أنا عندى حالة قرف من ناس كتير كنت دايما بحترم رأيهم وفجأة لقيتهم تغاضوا عن كل البلاوى دى بس علشان .. أم الشرعية أو لكرههم وجود سلطة عسكرية مع إنهم مابيقدموش أى بديل تانى غير بديل إتطرح مليون مرة قبل كدة وكان بيتهكموا عليه !!

إتقوا الله فى الفقرا .. إتقوا الله فى الناس الى تعبت .. إتقوا الله فى مصر !!