الإسلام فى 2013 .. لماذا إبتعد الشباب عن الدين ؟!! رؤية شاب غير متدين للأسباب


بتفرج على برنامج احمد الشقيرى وبستفاد منه جدا.

بتفرج على برنامج عمرو خالد وبعرف منه تاريخ اسلامى ماعرفش 90% منه.
بتفرج على معز مسعود ومصطفى حسنى وبستمتع جدا بكلامهم وبسيب كل الى فى ايدى واركز معاهم.
دا غير درس الشعرواى وحلقات الحبيب الجفرى.

اوقات كتير كنت بتضايق من نفسى علشان عمرى ماتفرجت على اى قناة دينية مصرية او الشيوخ الى كل اصدقائى السلفيين او المتدينين بيتكلموا عنهم وانا ولا اعرفهم وكنت كل ما احاول اتفرج عليهم امل منهم واحس ان تقريبا كل حاحة ف حياتى غلط او علشان التزم لازم ابطل 90% من الى بعمله بس مؤخرا ابتديت اقتنع ان العيب كله مش منى .. العيب فيهم اكتر, الناس الى انا بسمعها دى وعليها اعتراض من اغلب السلفيين او غيرهم لعدم التزامهم حتى بالدقن, الناس دى استوعبت ان عقل الشباب بقى فلسفى اكتر, استوعبت ضعفنا وان لينا رغبات فرضها علينا انفتاح الدنيا وسرعة ايقاعها فالناس دى بقت الواقع الدعوى الاسلامى الوحي الى بيوريك سماحة الدين وشكل المسلم الى بتفخر بيه وبتتمنى تبقى زيه, الناس دى بتتكلم فى عيوب موجودة وبتحاول تعالجها بتبتدى من الموجود فعلا مش تحرمه وماتوجدلوش حل مع انه اصلا موجود. الناس دى بتطلعلنا مش بتقول لينا انزلوا لمستوى عقلنا لان عقلنا كاجيل مختلف منفتح بيسأل كتير ومش بيصدق غير المقنع بقى محتاج تعب علشان تقنعه او تأثر عليه فى ظل عصر العلم والاباحية فيه طغوا على كل حاجة… هما ارتضوا بالواقع وبيشتغلوا من من المنطلق دا وفى غيرهم عايشين فى قرن فات وبتكلموا بالفصحى وبحرموا كل شئ موجود اصلا فى حياتنا واتعودنا عليه وبتقيدنا لدرجة اننا بننصرف تماما.

العيب مش فينا والدين لسه جوانا كل الموضوع اننا ضعاف ولينا دماغنا. الى مش بتتقبل كلام مرسل وكل الى محتاجيه حد يكلمنا بنفس طريقتنا ويفهم دماغنا وواقعنا وحياتنا الى مش فى يوم وليله هنغيرها وماينفرناش.

الكلام دا هيشمئز منه ناس كتير بس هيفهمه واحد متعود يفكر فى كل كلمة وهوا بيقراها حتى لو القرأن هيفهمه واحد مبرمج او واحد قاعد ع الكمبيوتر طول اليوم او واحد بيقرا ادب غربى شورقى او بيحب او واحد بيستمتع بصوت المسيقى وممكن ينام يوم بحاله يسمع هارد روك باستمتاع او ينسى نفسه فى حفلة هاوس او ينسجم بحاجات كتير ابعد من ان الكبار يقتنعوا بوجودها او اهميتها او واحد كل يوم ف النادى او الساحل او مصاحب او كل حياته جيمز او ريس او بيسكور او حاسس بغربة وسط عقول كتيرة حاسس انه ابعد منها بمراحل واحد عايش فى مجتمع مش معترف باهمية الى بيعمله دا عنده رغم ان فى زيه ملايين بس المجتمع عامل زى النعامة الى حاطة راسها ف الرمل فى مواجهتهم وبيتهم اى شاب يجادل بالكفر او الوجودية بدل مايناقشه بنفس مستوى عقله ويحاول يقنعه.

الناس للى بالنسبة للشيوخ مايعتبروش دعاة دين هما دول الى اساسا سبب فى حجاب بنات من طبقات مفهاش حجاب اساسا وهما سبب ان شاب بيلعب ميتال يصلى, الناس دى هما الامل ان الالحاد والنظرة الفلسفية الرياضية البحته للدنيا تختفى ف مصر فى الوقت الى اغلب شيوخ الدين المشاهير عايشين فى عصور فاتت وبيدفعوا الشباب للانصراف عن الدين بتطرفهم او قلة ادبهم او ترهيبهم الدائم وكلامهم لتينا باسلوب لا يؤثر فينا اكثر مما يضحكنا!!

العيب مش فى الشباب المستهتر بنسبة كبيرة.. العيب فى الى مش بيحتويهم ولا يخاطبهم بقدر عقولهم وثقافتهم ومش معترف ولا متقبل حياتهم واهتماماتهم التكنوليجية او الادبية او الموسيقية او الرياضية او الترفيهية الى مش متخيلين ان فجأة حد يقول لهم ان كلها حرام.

الاسلام علشان يزدهر زى زمان محتاج عقول تقدمية حتى لو مش ملتزمة 100% ومش محتاج عقول رجعيه حتى لو ملتزمة 100% والتاريخ والواقع مليان امثلة.