من سنتين .. راح الاستاد و رجع فى تابوت!! #افتكروهم

زى دلوقتى من سنتين 1/2/2012 كان فى واحد بيقول لوالدته يلاّ بسرعة ياماما حضرى الغدا علشان الحق صحابى، كان فى واحد بيحضر شنطة فيها سندوتشات و علم و ازازة مية و بيلبس التي شيرت الأحمر، زى دلوقتى كان فى اتوبيس بيطلع فيه واحد يسلم على صحابه و يغنى معاهم، كان فى واحد ماسك طبله أو بيلم الشماريخ فى شنطة، زى النهاردة من سنين كان فى واحد بيشرح الدخلة هتكون إزاى، كان فى طفل صغير مستمتع انه رايح الاستاد، كان فى شاب هوا و صحابه واقفين ع الطريق بيشتروا حاجة و هما فى طريقهم لبورسعيد ..

زى النهاردة من سنتين كل دول ماتوا …

ماتوا بسبب كره و غل و حقد جوا جمهور وسخ استحل دمهم أو شارك بهمجيته فى الفوضى الى قتلتهم، ماتوا بسبب تقصير مسئولين و مؤامرة علشان تكسرهم …
زى النهاردة مات 72 شاب كان الأهلى كل حياتهم، ماتوا بعد ما اترموا من فوق الاستاد او اتداس عليهم من التدافع او اتخنقوا ..
زى النهاردة من سنتين السما اتهزت و شيطان الأرض و اتباعه عاشوا يوم من اسعد ايامهم ..
زى النهاردة من سنتين الكورة بقى عليها دم، دم اخويا و اخوك دم صاحبى و صاحبك دم واحد منعرفش عنه حاجة غير انه راح يشوف ماتش كورة .. رجع فى تابوت !!

زى النهاردة مات 72 مشجع اهلاوى على استاد بورسعيد النجس بإيد جمهور و مجرمين أوسخ من إن يتقال عليهم بشر و بتواطؤ جهاز أقذر من أقذر حاجة شفتها فى حياتك !!

دمهم مش هيتنسى مهما افتكروا اننا نسينا !!