أسباب تخّلينى مقتنع إن فى حياة على كواكب تانية غير الأرض !!

الفضاء
الفضاء

بص للصورة الى فوق دى .. شايف إيه؟
فراغ .. فراغ كبير .. فراغ لا نهائى .. فراغ مهما تخيلت مش هتوصل فيه لنهاية و هتنتهى كل أمالك فى إكتشاف أخره

علشان كدة أنا مقتنع بوجود كائنات تانية فى الكون
(مش Aliens بالتصّور المتداول فى الافلام عن شكلهم و أطباقهم)
.. كائنات تانية وجودة فى عوالم تانية غير العالم بتاعنا لأن اكيد ربنا مخلقش ملايين المجّرات دى علشان مُجّرد كوكب واحد صغّير فى مجّرة واحدة!!

و مقتنع كمان إن ذى ما أكيد ناس كتير هتضحك على الكلام دا اكيد برضه فى مكان ما فى الفضاء الا نهائى دا فى مجموعة مش من البشر برضه قاعدة بتتريق على واحد من جنسهم قال انه مؤمن انهم مش لوحدهم فى الكون!!

عادى ..

و اعتقد كمان إن مش واحد صحى الصبح قال هكتب خيال علمى عن كائنات فضائية بتركب طبق بيلف حوالين نفسه … يعنى حتى لو القصة كلها من خياله كان اكيد لقى حاجة احسن من الطبق، علشان كدة انا شايف ان كل افلام الخيال العلمى ليها سند حقيقى (حد شاف، حد اتهيأله إنه شاف و كدة) ..
اصل أكيد يعنى فى حاجة حصلت فى يوم خلت كل الناس بتهرى فى السينما بقالها 50 سنة عن مركبة مدورة بينزل منها واحد راسه اكبر من جسمه !!

مبدأيا أنا التصور الى واصله دا لإيمانى التام ان ربنا خلق كل حاجة لسبب و لحكمة ما عنده و ان الى هقوله مجرد رأى خطأ او حتى تخاريف ..

انا قصدت اتكلم عن “غير البشر” لان البشر مقصود بيهم احنا كا كائنات عاقلة مدركة على “كوكب الأرض” .. القران بيتكلم ان سيدنا محمد و كل الرسل ربنا بعثهم لهدى “الناس” و ان ربنا خلق الجن و الانس و و و كل حاجة بتخاطبنا بتخاطبنا كا بشر و كا سكان الأرض

لإيمانى التام بالله و بحكمة الله أنا شايف اننا مش لوحدنا و ان حتى النهاية مش هتكون بيوم القيامة .. نهاية الأرض هتنتهى بيوم القيامة، نهاية البشر بس اكيد فى عوالم تانية فى اماكن تانية هيبتدى عليها حياه او يمكن اصلا يكون عليها حياه .. أصل انا على يقين أن ربنا مخلقش كل الملكوت دا كللللللله علشان بس بشر هيعيشوا 50 او 60 او 70 مليون سنه على كوكب و بعد كدة لما يجى يوم الحساب و البشر يدخلوا جنه او نار هيبقى خلاص كدة كل الفضاء الا نهائى دا ملوش لزمة !!!

ما يمكن يكون كوكب المريخ الى جنبنا و فى دلالات كتييير انه كان عليه حياه كان فعلا عليه نوع تانى من الكائنات عاشوا عليه مليارات السنين لحد ماجه يوم حسابهم و الكوكب انتهى !! و ربنا مذكرش دا فى القران علشان عقلنا كا بشر مش هيستوعبه أو يمكن يكون فى اصلا تفسير فى القران هيظهر كمان 500 سنة زى تفسير الذّرة الى ظهر فى أوائل الخمسينات !!
فى ناس ممكن تقول القرأن مفهوش تلميح لدا و القران شامل و جامع و سيدنا محمد مبعوث رحمة للناس اجمعين و هما عندهم حق تماماااا بس برضه كل دا هيوصل لنفس النتيجة –> إن كل دا موجة “بس” لسكان الأرض !!

و بعدين عمرك فى حياتك فكرت فى الأيه الى بتقول “وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً ۖ قَالُوا أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ ۖ قَالَ إِنِّي أَعْلَمُ مَا لَا تَعْلَمُونَ (30) ” 
عمرك فكرت إزاى الملائكة عرفت إن الإنسان هيعمل كدة؟
أعتقد انى لما أحّذر من حاجة بيبقى فى احتمال من اتنين ..
1- انى شفت حاجة زى دى بالضبط حصلت قبل كدة فا متوقع النتائج
2- إنى شفت حاجة شبه كدة حصلت فى مكان تانى فا متوقع نفس النتيجة !!

انك تأمن بوجود حياة تانية بنهاية مختلفه برسل و ديانات و عادات و اشكال تانية ابعد حتى من حدود خيالك مش معناه عدم ايمانك بالله و دا الى حاولت اوصله لما اتفتح الموضوع كذا مرة بس لما لقيت العقول مقفولة بطلت اتكلم ف الحوار

مرة تانية علشان الحتة دى محدش بيرضى يقربلها علشان خوفه على عقله او خوفه من تخوف الناس فى ايمانه او عدم قدرته على تقبل حاجة غير مألوفة .. و بأكد إن كلامى دا علشان انا مؤمن بالله قوى و على يقين تام ان مفيش حاجة موجودة كدة وخلاص !! و كل دا افتراضات شاب ساذج مدمن افلام اجنبى من وهوا عنده 8 سنين فا اكيد لحست عقله

شادى كمال قنديل – يناير 2014