تصحيح لمفاهيم مجتمعيه خاطئة و متخّلفة بنت ستين كلب !!

1- مينفعش تعمل شير لصورة حد مات خصوصا لو موته بسبب حادث اليم زى تفجير او تجمد أو حرق أو أيا كان علشان دا ليه حرمة !! لو مش عاجبك يبقى دا معناه إنك حد مريض ولو شايفنى أنا الى أوفر إنى بقول كدة يبقى يارب ينشروا صورة أشلائك يابعيد و تبقى تفرح إن أهلك و صحابك ع النت بيتفرجوا على حّتة مّنك !!

2- مينفعش كل حاجة نقول الجيش فين .. الجيش مأنقذش الناس ليه؟ الجيش مرصفش الطريق ليه؟ الجيش منزلش أمن الشارع ليه؟ مصنع الإنتاج الحربى معملش حلل و كذّرولات السنة دى ليه؟ الجيش مأكلش حمادة السيريلاك فى بوقه ليه؟ ليه؟ ليه؟ لييييه؟ .. مش دفاع عنه بس فى إختراع ظريف إسمه إن دى دولة مؤسسات فا كل مؤسسة ليها دورها و مش كل حاجة نجرى نقول الجيش معملهاش ليه و بعد كدة نزعل إننا بلد فاشله و مسيطر عليها تماما من المؤسسة دى !!

3- مفيش حاجة برضه إسمها “إيه وداهم هناك” بطلوا النغمة المتخلفة دى ..
حضرتِك ياّلى بتقولى إيه خّرج الشباب دول و وداهم سينا ماتزعليش من الشرطة الى مش مأمنة الشارع و إنتى راجعة متأخر و 5 أو 6 خدوكى فى حارة مزنوقة و إغتصبوكى .. أصل إيه رّجعك متأخر؟ إلبسى بقى !!
حضرتك لّما تتقلب بيك العربية ع الصحراوى بالليل ماتزعلش إن الطريق مظلم ومليان مطبات ومفيش إسعاف .. أصل إيه ياحيوان الى خّلاك تمشى ع الصحراوى بالليل أصلاً؟!!
فى إختراع ظريف إسمه إن كل واحد مسئول من ميتييييين أم بلده و إنه حتى لو هينتحر لازم البلد دى تفضل تعمل كلللللل الى تقدر عليه علشان تنقذه (مع إنه أصلا عاوز يموت) !!

4- مفيش حاجة كمان إسمها الشرطة هتأمن الشارع و لاّ هتأمن نفسها و لاّ هتعمل إيه ولاّ إيه ولاّ إيه؟
الّى دخل شرطة المفروض يعرف إنه مش دافع فوق ال50 ألف جنيه رشوة أو جايب 100 واسطة علشان بس يعّلق بادج على العربية و يبقى سعات الباشا !! .. المفروض يعرف إن شغلته دى فيها موت زى مانا عارف إن شغلتى دى بفضل ساعات بسببها قاعد ع الكرسى فوق ال 13 ساعة لحد ما بقت البتاعة بقت فلات ع الأخر و مع ذلك مش شايف إنى بمّن على حد ولا بتظّلم … ربنا يرحم الى مات لانه مات علشان بيأدى الواجب و دا واجب مش تفّضل!!

5- أخيراً .. مفيش حاجة إسمها لازم نقضى على فصيل كامل و نقعد نطّلب و نبّرر للجانب الى إحنا مواليين ليه وبس .. يعنى م الأخر مش هتصحى الصبح تلاقى المسيحيين الى مش من دينك ماتوا ولاّ السلفيين الى بيخوفوك اختفوا ولا الإنقلابيين زى مابتقول و لا الإخوان ولا الكنبه و لا ولا ولا رجعوا فى كلامهم و إتنازلوا عن عقيدتهم .. يبقى إيه العمل؟ يا هتقتلهم كلهم لو ضدهم و مش عارف تتعايش معاهم بس ماتزعلش من الإرهاب لإنه حتى لو كان موجود بنسبه فا انت بترويه لحد مايكبر و يبقى شجرة !! يا إيما تتعّلم تتعايش و تشوف حلول دبلوماسية و الكلام دا ينطبق ع الجميع بما فيهم الى دايرين ف الشوارع و مش عارفين إيه مطالبهم غير مطلب واحد بقى أصعب من إن فيفى عبده تبّطل تعمل أمووواه !!

يا جماعة طالما مرزوعين كلنا فى البلد مع بعض و مش ماشيين منها دلوقتى يبقى لازم معلش تتنازلوا شوية علشان خاطرنا .. فا ياريت لو مش هنتعب حضراتكم تحاولوا تتعّلموا و تبطلوا تبرروا و تطبلوا و تبربروا علينا … كفاية المّخاط عمانا و هنموت فى عز شبابنا بسببكم !! ولاّ نسيب يعنى أكل عيشنا و نعتزل الإنترنت علشان مانشوفش قرفكم ولاّ نعمل إيه بس !!

 

شادى كمال قنديل