مرحلة البلوغ .. أنا إبن مين يا نينة؟

احقر مرحلة في حياة الانسان هيا مرحلة البلوغ، المرحلة الي كل الناس (بما فيهم انت) بيحتقروك بدون ما يكون ليك أي ذنب و فجأة بتتحول من طفل الناس بتحب تلعب و تتصور معاه لبيضه متحركة علي الأرض كل الي حواليها مستسخفينها !!

الولد يكون عايش طفل وديع، خالته بتقعده علي حجرها و بنت عمته قاعدة قدامه عادي و بنت عم امه بتبوسه اول ماتزوهم و فجأة يلاقي صوته تخن و شنبه بقي ميفرقش كتير عن عادم سيارة وسّخله تحت مناخيره دا غير ان في اجزاء بتبتدي تتحرك تلقائيا و يتضطر بسببها يبطل يلبس بوكسر فضفاض، و بدون أي ذنب يلاقي خالته بطلت تقعده علي حجرها و بنت عمته بتجري تلبس طويل اول ما يروح عندهم و بنت عم أمه بتسلم من بعيد و بتعدل الطرحة أول ما يدخل.. بعد الصدمة و حالة الرفض دي ينعزل و يبتدي يتوجه لمجالس الرجال فيلاقي كل الي قاعدين مع أبوه أول ما يقول رأيه في حاجة يقوموا باصين نحيته و بيقولوا جواهم مين العّيل الي عامل نفسه راجل دا !! (الّي هوا يعني أحا اعمل انا ايه ولا اروح فين دلوقتي يا ولاد الكلب) .. و تدريجيا يبتدي يصاب بالتوحد و يفهم أبعاد انه مبقاش طفل و مع ذلك لسه مش راجل!!

البنت بقي تكون بتلعب مع حمادة إبن عمها و بتقعد بالهوت شورت ف البيت قدام اخواتها و بتبات عن طنط سعاد مع صحبتها و فجأة تشوف دم كتير مع ألم حاد غير مبرر و تاني يوم الصبح تفوق علي كل الهوت شورتس بيتشحتوا لبنت طنط سعاد برضه بس الصغيرة و الي مش هتعرف تبات تاني عندها، وتلاقي امها منعتها تلعب كمان مع حمادة (مع ان اصلا حمادة مش محتاج و ابتدي ينعزل تدريجيا لانه دلوقتي في مرحلة التوحد الي كنا بنحكي فيها فوق بعد ما كل الناس احتقروه و خالته اصلا بطلت تقوله بات عندنا يا حبيبي) و يوم ورا يوم علامات الانوسة تبتدي تبقلل و هيا تتصدم و تتكسف فا تمسك كتاب الدراسات الإجتماعية بطريقة تمنع إظهار منطقة الصدر وتبص لنفسها ف المراية بالليل بعد ما تقلع وهيا مُشتته مابين انهم ولا شبه بتوع اليسا تتباهي بيهم ولا مفيش اصلا زي الأول فا ترتاح من الكتاب الى طابق على صدرها طول ماهى فى الشارع، و تدريجيا تدخل في مرحلة كريمات إزالة النمش و تقفل اوضتها علي نفسها بعد ما تطرد اخوها منها للأبد و تسرح و هيا بتسمع اغنية بريتني I’m no a girl not yet a woman و تعيط..

المرحلة دي فعلا وسخة فشخ و إن الواحد يفتكرها أصلا بيستعيد كمية بؤس تخليه يروح يضرب ابن عمه الي عنده اتناشر سنه و الي صوته بقي شبه موتور العربية و مناخيره فنشرت بالقلم على وشه علشان بقي فعلا عّيل تنح تناحه بنت كلب و بعدها ياخده بالحضن اول ما يعيط و يقوله انا حاسس بيك.. معلش !!

اكتئاب المراهقة