عالمدرسة رايحين شهداء بالملايين … جولة فى أعماق كارثة #قطار_أسيوط
النهاردة لازم تسأل نفسك سؤال، الأطفال الى ماتوا دول أحسن لهم يموتوا دلوقتى ويرتاحوا ولا يستنوا علشان يموتوا لما يكبروا شوية؟
(خليك واقعى وبلاش تقول عليا متشائم والهرى دا ولو متفائل نفض لكلامى ومش تقراه)
الأطفال دى كدة كدة هتموت فى مصر وبنفس السبب “الإهمال” !!
أصلهم لو ماماتوش دلوقتى هيموتوا بكره لما مايلاقوش شغل ويغرقوا فى البحر المتوسط وهما رايحين على إيطاليا.
أصلهم لو ماماتوش دلوقتى هيموتوا من أكل مسرطن أو من عوادم مصانع أو سيارات أو من بقعة الزيت اى بتتمختر فى النيل.
أصلهم لو ماماتوش دلوقتى هيموتوا من ضرب الحشيش الى بقى متوافر فى السوق أكتر من انابيب البوتاجاز.
أصلهم لو ماماتوش دلوقتى هيموتوا فى مظاهرة ضد النظام سواء إخونى أو مدنى أو أى بطيخ المهم إن قناص أو ضابط هيموتهم ومالهومش دية.
أصلهم لو مامتوش دلوقتى هيموتوا وهما بيتفرجوا على ماتش كورة فى الإستاد.
أصلهم لو ماماتوش دلوقتى هيموتوا فى حادثة قطار برضه أو محروقين بقى فيه “هما ونصيبهم” أو على الصحراوى أو على الأتوستراد فى الضلمة أو مقطورة تهرسهم.
أصلهم لو ماماتوش دلوقتى كدة كدة هيموتوا وقريب أوى علشان دى بلد بنت ميتين كلب كلها إهماااااااااااااااااااااااااااااال
بلد بنت ميتين كلب فيها ناس ولاد ميتين كلب ميعرفوش إن فى أكتر من 50 أم دلوقتى بتبكى بنااااااااااااااار جوا قلبها.
بلد بنت ميتين كلب ماجابتش حق 74 مراهق مات وهوا بيتفرج عالكورة وطلع إبن ميتين كلب مسك فى إن الكورة حلال ولا لأ أصلا وماطالبش بحقهم فا طبيعى مش هتجيب حق 47 طفل مات
بلد بنت ميتين كلب هيجى واحد دلقوتى يرد يقولى أصلهم 46 مش 47 أو الإخوان أو مرسى أو قنديل مالهومش دعوة ويسيب الموضوع الرئيسى إن أطفال ماتت … أيوه أطفال ماتت بسبب كل واحد مسئول فى البلدى ورضى يكون مسئول فيها ودا شغله.
بلد بنت ميتين كلب كلها بتنهش فى لحم بعضها وكل واحد عاوز يلحق حته من السبوبة الى اسمها مصر سواء فى سلطة أو دستور أو منصب أو أى إبن ميتين كلب.
بلد بنت ميتين كلب أيووووووووووووووه بلد بنت ميتن كلب علشان أصحى من النوم على خبر موت حوالى 50 طفل، ياولاد المرة دا إسرائيل ماقتلتهمش فى غارات على غزة بقالها 3 أيام !!
أيووووه أنا متشائم لانى واقعى والأحسن إن الأطفال دى ماتت دلوقتى لان كان كدة كدة كددددددة هيموتوا فا اهم إرتاحوا بدرى وحرقوا قلب أهاليهم بدرى بدرى لأنهم كدة كدة كانوا هيحرقوا قلبهم يا بهجرة يا إما مش لاقين شغل يا إما مش عارفين يتجوزوا يا إما إضربوا فى قسم يا إما أدمنوا.
خليكوا كدة ماسكين فى دقن الضابط وشعر المذيعة ومدنية ولا لأ ووائل الإبراشى عميل وعكاشة البطة والإخوان كخة ولا مقطقطين وهنهد الأهرامات ولا لأ وفلسطين هتحتل سينا ولا نقفل المعابر ومين راح غزة ومين راح يدعك ركبه وإنسوا إننا بلد بقى الموت فيها أسهل بكتييييييييييييييييير من الحياة.
.. أم دماغكم كلها على .. أم دماغ كل واحد شايف إن الأولوية دلوقتى لأى حاجة فى الدنيا غير النااااااس الى بتموت من الجوع والإهمال ولو بقت مدنية أو دينية أو كافرة بنت وسخة مش هيفرق معاهم دا أكتر من رغيف العيش !!
مش عاجبك أسلوبى، طيب هسألك كام سؤال كدة …. عارف يعنى إيه أم كل ولادها يموتوا فى حادثة؟
يعنى أم هتصحى الصبح تصحى ولادها تلاقى كل السراير فاضية .. يعنى أم مش هتسمع صوت ولادها تانى غير فى خيالها بس .. يعنى أم مش هتروق الأوضة بتاعتهم تانى ولا هتحضر سندوتشات تانى غير لسبب واحد بس … إنها توزعها على قبرهم صدقة !!
تفتكر التعويض هيفيدها؟ .. تفتكر العقاب هيفيدها؟ .. طيب تفتكر إنها هتضحك تانى فى حياتها؟
أنا ماعرفش إيه الحل وماعنديش حل علشان حد يناقشنى فيه، بس تفتكر دا سبب مش كفاية ليا كا إنسان إنى ماشتمش البلد دى وأكرهها وأكون بالحالة دى دلوقتى؟
وفى النهاية أحب أكد إن فعلا: اسهل حاجة فى مصر دلوقتى انك تموت .. واصعب حاجة فيها انك تعيش !! وإن فعلا البشر إبتدوا ينقرضوا فى مصر، عارف ليه؟
علشان بيتم إستغلال فاجعة إنسانية #قطار_أسيوط (47 طفل شهيد) أكبر من مذبحة “بحر البقر” (30 طفل) فى الإنتهازية السياسية و الدليل أهو:
صفحة مكافحة العلمانية: أصل لو كل علمانى ليبرالى إتقى ربنا وقرأ دعاء الركوب ماكنش دا حصل فى البلد
عصام العريان: لو عندنا برلمان كنا حاسبنا المخطئ
صفحة مصر دولة مدنية: مرسى السبب وحكم الإخوان
صفحات الإخوان: هذا نتاج فساد عهد مبارك
علاء صادق: لا اتخيل إستغلال هذا الحادث فى مهاجة الرئيس مرسى
النشطاء: أدى الى خدناه من مرسى وحكومته
أسف ياريس: أيام مبارك مامتش عدد الأطفال دا
الإشتراكيون: عمال القطار مش السبب
الوزارة: التقصير من العمال
فى الأخر أسف عالأسلوب والألفاظ بس أنا أسف أكتر على حال بلد البشر فيها أرخص حاجة
حسبى الله ونعم الوكيل فى كل مسئول حسبى الله ونعم الوكيل
حسبى الله ونعم الوكيل
حسبى الله ونعم الوكيل
كتبها: شادى كمال قنديل
كل كلمة موجودة فى هذة المدونة انا من كتبها دون نقل أو مساعدة لذا فهى حق أصيل لى و تعبر عن رأى شخصى وغير مسموح بالنشر أو الأقتباس دون الرجوع لى لأن معظم المواضيع مسجلة بحقوق ملكية فكرية خاصة بى وموثقة, لذا أى نقل بغير موافقة شخصية منى أو إشارة للكاتب والموضوع الأصلى يعتبر سرقة
سبحان الله
كلامك جميل يا أستاذ شادي , بس لازم نفضل متمسكين بالأمل
اكيد في أمل
بإذن الله في امل